أخبار مركز المحلة

حسين عقل: مستمر في خدمة أهالي مركز المحلة.. والفوز الأكبر هو السيرة الحسنة

حوار خاص مع حسين عقل، المرشح السابق لانتخابات مجلس النواب عن دائرة مركز المحلة الكبرى، حول تجربته الانتخابية، واستمراره في العمل الخدمي، وموقفه من الانتخابات المقبلة.

 بعد عدم توفيقك في الانتخابات البرلمانية السابقة، إيه أبرز الدروس اللي خرجت بيها من التجربة؟ وإيه الأسباب من وجهة نظرك اللي أدت للنتيجة دي؟

 

الحمد لله، اتعلمت حاجات كتيرة جدًا، وأخدت بعض الدروس اللي ببني عليها حاليًا للمستقبل، ومفيش حاجة بتتبني في يوم وليلة. أنا أخدت خطوة الانتخابات في فترة قصيرة جدًا، ومكنتش الخطوة دي متوقعة للبعض أبدًا.

وللأسف، تأخيري في إعلان ترشحي قبل قفل باب الترشح بـ72 ساعة، لأسباب شخصية، فتح المجال لانتشار الشائعات والحاجات المغلوطة، واشتغل عليها بعض المغرضين، ووصل الحال للضرب من تحت الحزام.

الشائعات المغلوطة دي ضربتني في الشارع علشان أكون لوحدي ومقدرش أتحرك في الدائرة، وللأسف نجحت الشائعات دي إنها تحجم ناس كتير عني، وأصبحت وحيدًا أسعى هنا وهناك.

لكن الحمد لله، ربنا كان أكبر من الجميع، واجتهدت على قد الإمكانيات المتاحة، وقدرت أحقق جيم باحترام وشرف فقط.

 رغم انتهاء الانتخابات، فضلت موجود وسط الناس وفتحت مكتب لخدمة المواطنين. إيه الهدف من المكتب، وإيه أبرز الخدمات اللي بيقدمها؟

أنا كده كده موجود مع الناس في الشارع، وأنا وعدتهم بكده أيام فترة الانتخابات. ومن قبل الانتخابات، أنا متواجد منذ أكتر من 20 عامًا، بس مكنش عندي نية للترشح.

لكن قرار الترشح جه بدفع من الشباب والشارع، وكان فيه إحساس إن الشارع فعلًا محتاج إن يكون فيه حد منهم موجود وقادر على العطاء في الجزء ده.

 هل تقدر تقول لنا إيه أبرز المشكلات اللي نجحت في حلها من خلال المكتب، وإيه الملفات اللي لسه بتسعى لحلها؟

بفضل الله، قدرت في الفترة الماضية إني أفتح فصول خدمات الثانوية العامة بمدرسة السادات الثانوية بدمرو، واستفاد بيها أكتر من 170 طالبًا وطالبة على مستوى أكتر من 18 قرية بمركز المحلة الكبرى.

وده بعد ما كان الطلاب هيسافروا مدينة المحلة، وده كان هيحمل أولياء الأمور أعباء مادية ومعنوية كبيرة، إلى جانب مشاكل المواصلات اللي لا تنتهي، وعامل الوقت وتأثيره على الطلاب، مما يؤثر بالسلب على دروسهم ومذاكرتهم.

وبالتالي، ده كان نجاحًا كبيرًا وكويسًا ليا بفضل الله، إني أقدر أوفر الخدمة دي لأهالينا الكرام، وأدي لأهالي ثقة كبيرة فيا بعد ما مشينا مشوارًا طويلًا جدًا مع بعض.

عندي ملفات كتيرة شغال عليها، لكن بحب لما أخلص حاجة أعلن عنها بإذن الله.

إزاي بتتعامل مع شكاوى المواطنين في ظل إنك مش عضو في مجلس النواب حاليًا؟ وإيه الأدوات اللي بتعتمد عليها للوصول للمسؤولين؟

بالفعل، بيجيلي طلبات كتيرة من الأهالي، وبحاول أعتمد على نفسي، وأبدأ أشتغل عليها من خلال القنوات المشروعة، وأجتهد إني أخلص بعضها، وفي النهاية التوفيق بتاع ربنا سبحانه وتعالى.

فيه ناس ممكن تعتبر استمرار العمل الخدمي استعدادًا لانتخابات جديدة، إزاي ترد على وجهة النظر دي؟

أنا مستمر مع الناس في الشارع زي ما وعدتهم في فترة الانتخابات الماضية سنة 2025. معنديش مصالح أسعى إني أحميها، ومكنتش نازل الانتخابات من أجلها. مصلحتي الوحيدة هي بلدي مصر أولًا وأخيرًا.

ولكوني من صغري وأنا شغال في العمل العام، منذ عام 2000، وأنا داخل العمل السياسي والخدمي والاجتماعي، مرورًا بسنة 2005 وحتى 2026، أنا متواجد رغم صغر سني، 35 عامًا.

بفضل الله، أنا بحب العمل العام وعندي طموح، وبسعى إني أحقق الطموح ده لصالح أهالينا الكرام، لأن الناس محتاجة حد بجد يشتغل من أجلها.

هل حسمت قرارك بشأن خوض الانتخابات البرلمانية المقبلة؟ ولو قررت الترشح، إيه اللي هتقدمه بشكل مختلف عن تجربتك السابقة؟

أعتقد إن السؤال ده لسه بدري عليه، ومحدش ضامن عمره، كلنا بين إيدين الله سبحانه وتعالى.

أنا شغال من أجل الناس، وليس من أجل المنصب. لو ليا نصيب في إني أترشح، وقتها أكيد هترشح، ولو ماليش نصيب، هكون برضه في صف الناس، وده الأهم من الكراسي والمناصب.

الفوز الأكبر هو السيرة الحسنة بين الناس، وسيرة الإنسان أطول من العمر والمناصب، وده اللي بسعى إليه، والله شاهد ونعم الوكيل.

 من وجهة نظرك، إيه أبرز المشكلات اللي بتواجه أهالي الدائرة حاليًا، وإيه الأولويات اللي لازم تكون على أجندة أي نائب يمثلهم؟

الإرادة، مفيش حد عنده إرادة للعمل، وأنا على يقين بكده. لأن للأسف مشكلتنا إن أغلب اللي بييجوا بيكونوا نازلين لمصالحهم، إلا من رحم ربي.

هما عارفين كويس إيه اللي الناس محتاجاه، لكن للأسف مفيش طاقة للتنفيذ. وإحنا قلنا إن مفيش نائب شارع بجد، كله جاي من برج عالي، وداخل ينفذ حاجة معينة في دماغه أولًا، وهي المصلحة الشخصية.

بدليل إن فيه ناس كتير بتنفق ملايين طائلة، وبعد كده بتحاول تردها بطرق أو بأخرى، ودول كتير جدًا، إلا من رحم ربي.

للأسف، مفيش إرادة حقيقية للعمل من أجل المواطن، ومحدش شايف حتى صوتًا حقيقيًا يعبر عن الناس في المجلس، وفيه حالة صمت رهيبة وتامة.

لو رجع بيك الوقت لتجربتك الانتخابية السابقة، إيه القرار اللي كنت هتغيره؟ وإيه رسالتك لأهالي الدائرة اللي دعموك واللي لم يمنحوك أصواتهم؟

رسالتي لكل من دعمني: شكرًا لأنك وثقت فيا وأديتني صوتك، وأنا قلت لكم مش هخذلكم، وبالفعل أنا مستمر في العمل من أجلكم، من غير منصب، ومن غير ما أنتظر أي شيء.

أما الناس اللي متشرفتش إني أخدت أصواتهم، فأنا بحترم رأيكم جدًا، ووعدت حضراتكم إني لو محصلش نصيب في أصواتكم، هشتغل على نفسي أكثر وأكثر، لحد ما أوصل بجهدي وعرقي فقط.

ونصيحة لوجه الله: ادِّي صوتك للي معاك بجد، مش اللي بيمثل عليك فترة وبعد كده سلام. صوتك لمن يستحق، حتى لو مكنش أنا.

وفي النهاية، استمرارية السعي لا تعني حتمية الوصول، فكل شيء بيد الله سبحانه وتعالى.

مقالات ذات صلة

زر الذهاب إلى الأعلى